News
share
寰亞電影《春嬌救志明》票房破億 楊千嬅、余文樂、彭浩翔穿梭全國各地宣傳謝票
2017-05-02

好消息,新片《春嬌救志明》在楊千嬅,余文樂、導演彭浩翔以及各演員,兵分幾路,穿梭香港、北京、廣州、大連、深圳、長沙、成都、武漢等地,馬不停蹄全國宣傳,更連夜跑戲院謝票之下,香港票房突破1246萬元,內地票房更衝破1.13億元人民幣,口碑載譽,叫好叫座。千嬅與彭導昨晚切蛋糕慶祝票房破億,今日(2日)已抵達成都親親大熊貓,又餵他們開餐,二人穿上全副保護衣拍照,彭導facebook抵死留言:「謝票謝到戴晒套!」而且替其中一隻萌爆大熊貓命名「春嬌」!

千嬅和阿樂花盡心思完成拍攝,日前終於拍住拖欣賞新戲,散場後千嬅眼泛淚光:「好感動,呢幾個月喺片場受嘅欺凌都值得!」阿樂重演戲中爛gag,上下打量千嬅,然後遞上紙巾說:「依?你濕晒喎!」千嬅破涕為笑。他揚言睇好千嬅繼上集攞影后,第3集將再下一城,千嬅反而對阿樂和導演彭浩翔攞獎有信心。

阿樂說:「我一路睇,一路啲回憶返晒嚟,好難得有一班人,8年嚟仲一齊繼續拍呢部戲,剛才聽到全戲院啲觀眾一齊大笑,我最感到滿足和開心,而感動位有女士喊到濕晒,亦好正常嘅!我?我份人內歛,返屋企先喊!」千嬅激動大讚阿樂演得好,阿樂叫她冷靜,但她說:「我真係好激動,因為有啲部份分開拍,本應互相唔知對方點演,但因為好有默契,我哋無傾過,只係估對方會點做而去演自己嗰部份。今日終於睇到,全部啱晒呀,好開心、好開心,好有成功感呀!」見她開心到彈彈跳,阿樂亦被感染笑不攏咀。他說:「真心講,我無考究套戲好唔好睇、冇擔心過成績。因為呢部戲對我哋嘅意義實在太大,完成咗已經好滿足!」他笑言這是終極一集:「大家一定要嚟支持,應該冇下舖,有得睇就睇啦,告別作呀吓!」千嬅追打他:「我啋過你呀!」

此外,千嬅投訴拍戲時慘遭阿樂和導演聯手欺凌,日前在深圳站宣傳時,「腿張開」陳逸寧、「Brenda」林兆霞和閻汶宣等「春嬌幫」,為好姊妹公審「張志明」花心、亂使錢、不求上進和最大罪名「冇黃曉明咁靚仔」,全場爆笑!阿樂反擊:「男人都係咁架啦!」原本與阿樂同一陣線的彭導更調轉槍頭,叫姊妹團用大麻繩綑綁千嬅與阿樂,永不分離,阿樂直斥導演「重口味」。兩陣營互相吵鬧,最終「志明」送花講情話又從後擁抱「春嬌」,派糖收場!而長沙站有男觀眾因前一晚醉酒激嬲女友,趁千嬅和彭導謝票時,即場跪地送花箍煲兼求婚, 女友爆喊,千嬅亦好感動。

Website Security Test