出道13年、參加歌唱比賽入行的唱作歌手陳健安（安仔），宣布明年3月2及3日，假旺角麥花臣場館舉行第一次實體個唱「陳健安 Live afteR Life 2024演唱會」，票價分別HK$880和HK$580，2024年1月8日 (上午10時) 起恒生信用咭卡優先購票，「族人」（安仔歌迷暱稱）密切留意。
今次安仔演唱會名字「Live afteR Life」與新碟名字「Life afteR Life」只差一個字母，他說：「因為今次唱片與演唱會有呼應主題內容，扣得好緊，所以只換一個字母就變成演唱會名。概念由創作總監Oscar Lee從德國哲學家『尼采』（Friedrich Wilhelm Nietzsche）其中一句名言：『To live is to suffer, to survive is to find some meaning in the suffering.』得到啟發。呢句話嘅意思係『生存就要受苦，求生是在苦難中尋找意義』每個人都會經歷痛苦，點樣從中領悟和學習，就係今次演唱會主題概念。」
安仔的唱片設計成一層叠一層，代表人生由不斷的經歷累積而成；而演唱會海報拍攝布置，亦是由過百張安仔成長有關的相片組成。他圍住圓形道具逐一介紹：「呢張係我幼稚園畢業相；呢張同阿爸合照，我阿爸好有型，當時佢刨緊馬經；呢張同媽媽喺屯門市鎮公園（現名『屯門公園』）影，我細個M字額，好彩依家唔係；呢張同大哥合照，之前佢過咗身，我影呢張嘅時候玩鬥雞眼；呢張係我單飛第一首歌《一吻穿越四十六億歲》MV片段；呢張15歲去緬典比賽，我剷青；仲有我代表港青（香港足球青年代表隊）去比賽嘅時候；嗱，呢張好重要，係我個人歌迷會『本原族』成立日大合照，七月影，嗰日仲係我生日。除此之外，仲有好多MV嘅花絮同埋城市嘅相片。」
演唱會歌單已落實，安仔表示：「歌單幾乎完成，部份要重新編曲，為配合主題亦會選唱別人嘅歌。作為演唱會，音樂係最重要，我放好多資源喺音樂，例如會用多啲樂手演奏不同樂器。今次係我第一次個人實體演唱會，已安排歌唱老師補課，加強唱功，強化自己不足之處。麥花臣場館表演同觀眾距離好近，我會喺台上分享經歷、承受過嘅事，點樣用音樂創作去走過難關。」至於表演嘉賓，安仔先賣關子。
恒生信用卡優先購票
優先購票日期：2024年1月8日 (上午10時) 至1月10日 (晚上11時59分)
優先購票渠道：www.hotdogtix.com 或 HotdogTIX手機應用程式
*恒生信用卡客戶必須先登記成為HotdogTIX會員，方可享優先購票。
演唱會詳情
陳健安 Live afteR Life 2024演唱會
日期：2024年 3月2至3日
時間：8PM
地點：旺角麥花臣場館
票價：HK$880 / $580
主辦機構：寰亞娛樂 / 東亞娛樂
注意事項：主辦機構呼籲市民應循正式途徑購票，以免受騙及招致損失。 有關票務詳情，請參閱購票網站之條款及細則說明。
