香港歌手鄭欣宜（Joyce），一連三場紅館舉行「AIA 呈獻Between Us 鄭欣宜演唱會2022」，昨晚尾場，張敬軒、C AllStar的陳健安、Nowhere Boys主音Van與太太Wendy、Mirror隊長楊樂文（Lokman）與女友Luxi、女團COLLAR和AGA等捧場，他們現身觀眾席時都掀起哄動。台上欣宜又喊又笑，觀眾反應非常熱烈，四度Encore，圓滿結束。
昨晚尾場由Joyce的「異父異母孖寶」許廷鏗（Alfred）擔任壓軸表演嘉賓，介紹他出場時，說：「我同佢識於微時、兩小無猜，經常頭貼頭手牽手，仲傳過緋聞，其實我都有諗過我哋究竟係友情？定係愛情？」然後音樂響起Alfred的歌《好好戀愛》，全場尖叫，他與Joyce合唱，又扮作深情對望和摸臉，甚至作狀咀嘴，結果忍不住爆笑。之後他們認真地唱到最後一句時，眼紅紅幾乎哭出來。
之後Alfred說：「我哋睇住對方經歷高高低低，但無論邊個高邊個低，都會喺對方身邊。」Joyce聞言忍不住哭起來。合唱《半份關心》後，Alfred送上一張特別版黑膠唱片，台下軒仔大叫「你又送黑膠」，全場大笑。原來之前Alfred任軒仔演唱會嘉賓時，都是送黑膠碟給他，不過今次送Joyce的是另一款特別版，而且封套背後由Alfred親手畫二人合照。Alfred說：「呢張相係2015年影，當時我哋仲係傻更更，未踏足過紅館，我哋約定將來邊個登上紅館舞台，對方都要在場。」二人台上相擁爆喊。當Joyce落台補妝，Alfred獨唱《面具》時，他說：「今日下午我哋綵排時，Joyce突然攬住我喊。我知佢為咗今次演唱會付出200%努力，要搞一個紅館演唱會並唔簡單，希望大家以熱烈嘅歡呼聲和掌聲，話畀Joyce知，佢係一位值得被愛嘅香港歌手！」全場掌聲和歡呼聲。
此外，Joyce在演唱會上獻唱新歌《仍會等》前分享愛情觀，她說：「我喺愛情路上並無得到過多少鼓勵，甚至自小被寫成一個唔值得被愛嘅人，喺脆弱嘅時候，覺得自己係一個愛情失敗者，懷疑自己係咪值得被愛？但我仍然相信愛情，相信喺我搵緊真命天子嘅同時，可能佢都搵緊我呢！」
Alfred表演後返回觀眾席，坐在軒仔旁繼續欣賞Joyce表演，尾聲時，他們更齊齊熱情大叫嗌Encore，觀眾亦踏地板和歡呼和應。Joyce穿上自己肖象的衛衣上返舞台，向觀眾席軒仔笑說：「我今晚真係好難專心，因為『皇上駕到』，如果唔係防疫，我一定拉埋佢上台！」又問自己表現如何？軒仔立即高舉雙手姆指兼提高一隻腳，以示舉腳支持，還再向她送飛吻。全場反應熱烈，四度Encore，她感動落淚，瞓地手腳並用做心心動作答謝觀眾愛戴，軒仔等嘉賓亦與全場觀眾亦雙眼手做心心動作回應。Joyce向觀眾承諾：「我哋勾手指尾，約定下次再見，一定有下一次，仲會好快，只要大家繼續愛我！」最後她一邊飛吻一邊退場，一連三場紅館演唱會完美落幕！
