恭喜「唱作王子」馮允謙（Jay Fung）願望成真，今年7月舉行首次個人演唱會！
今年是Jay出道10周年，創作與歌唱成績屢創佳績，宣布今年七月二至四日，假九龍灣國際展貿中心StarHall舉行一連三場「馮允謙Have a JAY Time 2022 演唱會」，並首度挑戰四面台，票價港幣680元，4月25日東亞銀行信用卡優先訂票。今日演唱會海報曝光，一向守身如玉的Jay，激罕解開衫鈕，貼身上衣脹卜卜胸肌若隱若現，非常吸睛。
演唱會海報曝光，立即掀起Fans圈熱話，Jay去年吸血鬼獵人造型深入民心，今次卸下黑色西裝和大褸，在個唱海報展現陽光和性感一面，令人眼前一亮。他說：「今次海報拍攝，喺設計師Kenji屋企嘅花園取景，藍天白雲仲有小河流，好有大自然感覺。今次影相最大挑戰，係我前兩日同屋企人上郵輪玩，好開心，食咗好多嘢，嚟到影海報時就知驚！」穿著白色上衣，結實胸膛，讓人看得熱血沸騰，拍攝團隊更為Fans謀取福利，不停解開Jay的衫鈕，挑戰他的性感尺度。「唔知點解工作團隊個個想我騷少少胸肌？不停除我啲衫鈕，有少少尷尬，好驚啲肥膏『咇』晒出嚟！多謝攝影師好叻，搵啱角度，影到好靚！」Jay笑說。
今年是Jay 出道10周年，夢想成真舉行個唱，他非常興奮和期待，最感激一班忠粉：「最多謝係Fans，好多由我初出道就一直陪伴，畀好多鼓勵和支持，有段時間我無晒自信心，甚至想放棄唔再做歌手，係佢哋無放棄我，不斷傳訊息叫我加油，成日問我幾時出歌，畀咗好大嘅力量令我堅持。我會做好今次演唱會報答佢哋。」除了Fans和家人，Jay亦希望邀請合作過的歌手朋友來睇騷，分享開騷的喜悅。
個唱開騷倒數尚餘70天，Jay透露正努力減磅，他說：「去年減咗 15 磅，但自從爸爸返咗香港同我一齊住，呢半年佢日日煮好多好好味嘅嘢畀我食，我唔食佢會嬲，作為孝順仔一定要食晒，結果重咗10磅，就嚟開騷我真係唔可以再食。」因為要排舞練歌，加上工作量大增，Jay減磅計劃順利進行中，而另一挑戰是背歌詞，他笑說：「我記性唔好，要記晒啲中文歌詞要花好多時間，所以我將演唱會嘅歌放晒入Playlist不停聽，瞓覺都聽，希望發夢都記得。」
演唱會詳情:
「馮允謙Have a JAY Time 2022 演唱會」
日期：2022年7月2至4日(星期六/日/一)
時間：晚上8時15分
地點：九龍灣國際展貿中心 – 匯星(Star Hall)
主辦機構：寰亞娛樂 / 東亞娛樂
東亞銀行信用卡優先訂票
優先訂票日期：2022年4月25日 (上午10時) 至4月27日 (晚上11時59分)
優先訂票渠道：www.hotdogtix.com 或 HotdogTIX手機應用程式
票價：HK$680
注意事項：觀眾入場及觀看演出時須遵守政府公佈之最新預防及控制疾病規例，並配合演出場地的入場安排。否則場地職員有權拒絕其進場，有關演唱會門票費用、客戶服務費及速遞費用，恕不退還。
