过去，ANSONBEAN推出了多首题材较为沉重的HipHop类型作品，包括《RISE》、《OMG》以及《LOVE / PAIN》，但无论是身边朋友抑或豆粉（歌迷的称号）都期待他推出舒情歌，挑战不同歌曲种类。今年情人节，ANSONBEAN徇众要求推出冧爆情歌，亲自填写Rap词，更邀请「小薯茄」的阿冰担任MV女主角，「豆冰CP」MV耍花枪放闪！
ANSONBEAN透露《聪明豆》原定去年圣诞节推出，结果今年情人节才面世，他说：「今次新歌邀请舒老闆（舒文）帮我度身订造一首情歌，佢系一个好严厉嘅监制，教识咗我好多嘢，原本首歌系圣诞节推出，但我哋想再做好啲，不断改进，最终变成我2023年第一首派台歌，多谢舒老闆帮手邀请Wyman填词，我好开心。」
《聪明豆》班底强劲，据知录歌时，舒文转传Wyman的whatsapp录音给ANSONBEAN，帮助他更了解和投入歌词内容。「当时段录音系话，『呀！呢条女好烦呀！究竟佢谂紧咩？』，佢想我表达嘅感觉唔系好惨、唔开心，而系好似跟朋友吐苦水，遇到一个对自己若即若离嘅女仔，希望可以好似歌名咁，食粒聪明豆，解决到呢个烦恼。」现实生活中，ANSONBEAN可有遇过这种似有还无的女孩子？他坦言在英国读书时曾经遇过，当时同样找不到方法解决，未能令关系更进一步。
他说：「其实呢首唔单只系一首情歌，套用喺人生、工作上都可以，以我自己为例，我性格好『冲』，有阵时录歌、练舞，觉得用『力』可以解决问题，所以录《聪明豆》嘅时候，舒老闆不断叫我聪明啲去谂，点样可以唱好啲，所以呢首《聪明豆》除咗系情人节送俾豆粉嘅礼物，同时亦提醒我自己，做人要聪明啲。」
以往ANSONBEAN都会积极参与歌曲上的创作，今次亦不例外，首次尝试为情歌填上rap词，他解释：「其实我没信心写情歌，但舒老闆觉得music break部分比较静，认为可以加入rap嘅元素，最后我用咗两日时间写咗个内容，但其实唔算系rap，系一篇对话，讲出对呢段感情嘅无奈、一种内心嘅读白。」
今次MV，邀请电影《1人婚礼》女主角、「小薯茄」的阿冰饰演MV女主角，与ANSONBEAN配成「豆冰CP」。MV故事由ANSONBEAN邂逅刚搬来邻居阿冰，互有好感，但当ANSONBEAN鼓起勇气打算表白时，阿冰却人间蒸发。MV不乏甜蜜温馨的画面，其中一场戏他们在窗边晾衫，期间两人耍花枪互打，不慎把衣服丢到楼下单位。问阿冰对ANSONBEAN的感觉，她笑说：「我觉得ANSONBEAN系一个好人，经常笑容满面，我唔锺意啲衰人，（但你MV入面做衰人，忽然间消失）唔系呀！唔系呀！我系有原因消失，大家可以睇个MV猜想一下。」
