預祝陳健安明天（15日）快樂生辰！
日前他與歌迷會「本原族」逾百族人慶祝生日，兼歌迷會成立三周年紀念。現場布置多個打卡位，族人一家大小到賀，與安仔玩遊戲、唱歌、抽獎、合照、切生日蛋糕，玩到又笑又叫，非常盡興。生日願望除了夾公仔得心應手，大家身心健康，安仔希望在更大場地再舉行個唱。
眾所周知安仔寵粉，自己生日反而狂送出禮物和海報、落場一齊玩遊戲、即場親手刨西瓜冰，還自?喇叭首唱新歌《額頭有字》，讓族人先聽為快。看見歌迷會「本原族」日漸成長，族人相親相愛，安仔感安慰，說：「歡迎新『族人』，亦多謝一直支持我嘅舊『族人』，我哋嘅相遇永遠都係不遲不早。唔使擔心好遲先認識我，最緊要有認識。好多謝你哋嘅愛，我會繼續做好多作品，希望我唱歌每次都有進步。」安仔透露剛收到新歌歌詞，即將錄音，族人都興奮歡呼。
當日族人分成4組，安仔每個遊戲都加入其中一組做皇牌，如該組勝出就贏雙倍分數。遊戲以他的歌曲命名，包括《創作者的派對》、《不遲不早》、《當我們返回現世》和《我違和但我不糾正》等，全部都是集體遊戲，場面熱鬧，安仔和兩位司儀嗌到聲嘶力竭，好搞笑。玩完遊戲，安仔表示要加插項目，首唱新歌《額頭有字》，還全場大合唱，他開心到跳吓跳吓，他讚歎：「呢個版本係無可取代！」
「我好開心！一入場見到啲布置好靚，一年靚過一年，佢哋知我喜歡嘅嘢都整晒出嚟。睇吓個生日蛋糕，有我鍾意Chiikawa嘅兔兔、外星人，超靚！佢哋整咗啲盲盒，內有不同款嘅手機磁吸，仲有隱藏版，識玩！另有三款小卡隨機送，有令我沉迷嘅光柵卡、熨金簽名卡和閃卡。佢哋知我鍾意日本嘢，印咗啲昭和風格小海報。」安仔感激族人為他生日花盡心思。他有回禮：「我精挑咗好多夾嘅公仔送畀大家，以sweet為主題，例如一對對嘅公仔或者甜品系列，亦有我割愛嘅Chiikawa特別版和神秘禮物 ，希望大家鍾意。」期間安仔誤認小新妹妹是小新女友，全場爆笑。
生日正日，安仔表示會去踢足球，而生日願望，他說：「鍾意夾公仔嘅朋友，包括我，順利夾到想夾嘅嘢。我繼續做歌、唱歌繼續進步。大家身心健康，自在寫意！」至於開演唱會，他說：「單飛至今都有廿幾卅首歌，近年又多咗啲新歌。上次喺麥花臣開咗4場，但都有歌迷話買唔到飛，希望喺更大嘅場地開騷。呢個唔只生日願望，係目標。」
