已經四度公演的舞台劇《二人餐》，今年8月載譽歸來，換上全新演員陣容，由C AllStar的梁釗峰、《二月廿九》女主角吳海昕和ViuTV一哥主持強尼孭飛，假沙田大會堂文娛廳演出，8月26日至9月4日的門票上周開售，火速售罄。今日宣布加開9月6日至9日12日共6場，將於 2022年5月27日上午10時於art-mate 公開發售。釗峰和吳海昕又唱又演，強尼更會邊煮邊唱，他們期待台上一邊演一邊食，令全場充滿食物的香味。
《二人餐》於2006年7月首度登場，至2011年四度公演，今年換上三位舞台劇初哥演出，令人感覺煥然一新。日前釗峰，吳海昕和強尼，以及今次音樂部份的揸弗人「新青年理髮廳」成員歐陽德輝，一同拍攝宣傳海報，四位穿上色彩斑斕的服裝開party，吳海昕和釗峰捧著一碟意粉卿卿我我、強尼搖著酒杯、歐陽德輝咬著Pizza，工作人員落力地向他們噴紙炮，氣氛熱鬧。
演出一個很經典的劇目，釗峰、吳海昕和強尼揚言興奮多於壓力，他們爆料指導演馬志豪下禁令，禁止他們翻看彭秀慧、張銘耀（German）和徐羨曾之前的版本。釗峰說：「《二人餐》係一齣好成功嘅舞台劇目，我知道要演呢個舞台劇嘅時候，想搵彭秀慧老師嘅版本嚟參考吓，點知導演馬志豪唔准，佢唔想我哋被之前嘅版本影響，今次要任我哋玩。」在旁的吳海昕說：「係呀，未收劇本之前導演都好神秘，佢想我哋用自己嘅Style去演。我哋已經開始讀劇本和夾歌，我對音樂唔係好熟悉，好彩有釗峰帶住我係咁練習，依家一見面就自然會起歌。」釗峰說：「我一見到大家，腦海立即浮現歌詞，情節湧現，進入狀態。」強尼說：「大家都知彭秀慧演得好，我仲跟張銘耀學演戲，可想而知之前個版本有幾勁。加上知道釗峰和吳海昕係今次男女主角，我唔使考慮，一口答應！」
吳海昕最期待一邊演戲一邊開餐，她說：「我好鍾意一邊演戲一邊食嘢，會演得更自然，好期待到時全場充滿食物嘅香味！」強尼笑說：「我飾演一位廚師，一邊演一邊煮，好想睇你哋無論我煮得好唔好食，都要演到好似好好味咁嘅樣會係點。」相對即場下廚，他坦言台上唱歌更大挑戰。
