「羽毛球王子」江博熙（Hei）、參加選秀節目仿GD唱《BANG BANG BANG》為人認識的楊煜謙（Nicolas）、唱作界新人成基哲（Blues）和「田徑小子」劉俊亨（Matthew），四個千禧後出生的GenZ男生，齊齊簽到寰亞旗下。雖然四子性格不同，Nicolas、Hei和Matthew較內斂偏「I」型，但因為Blues典型「E」人，活潑開朗，初次見面就主動打開話匣子，加上經常一齊工作，朝夕相對，四子火速成為老best。
日前Hei為同月生日的三子搞生日會，還準備六舊腹肌造型的生日蛋糕，互祝大紅大紫，追夢成功。暖男Nicolas說：「我願望係最重要嘅人同我慶祝，今日已達成！」而Matthew興奮表示心願超標達成，說：「剛剛去咗澳門睇王嘉爾（Jackson Wang）演唱會，好開心同佢影到合照，佢係我偶像，啟發我好多。我諗住扮鎮定，點知一見到佢我就stone咗，淨係講咗『我好鍾意你』！」超可愛。
開party當然要玩遊戲，他們各準備一個遊戲跟大家較量。齊齊吹波波布置場地後，開始「我係人，我唔係豬」遊戲熱身賽鬥嘴。Hei和Matthew口齒伶俐順利過關，Nicolas和Blues第一回合就敗陣。熱身賽都有大懲罰，輸家被蒙眼餵食加料wasabi薯片，Hei和Matthew非常重手，Nicolas和Blues食一啖就慘叫。之後玩考反應遊戲「接網球」，兩個專心比賽，另外兩個故意騷擾對手，多個回合之後，結果打和。
第三個是網紅game「估排位」，更加入「獎金」增添刺激，他們先以包剪揼決定出賽次序，Matthew猜赢，更先拔頭籌第一支就估中兼獲得最高獎金，更得心應手估中最多成贏家攞大獎：「一百萬円」魷魚絲，他領獎時無奈表情勁搞笑。壓軸遊戲「蒙眼包剪揼+扑傻瓜」考運氣又考反應，Hei當打羽毛球殺波出盡全力，吹氣鎚仔被他打到漏氣變形，Matthew的眼鏡慘被打甩。Hei更被選為「是日遊戲王」，因為他全力以赴。Matthew、Nicolas和Blues聯手向Hei下戰書：「12月Hei生日再開party，我哋要報仇！」
